నిన్నటి చేదులు విరిగి మధువుగ మారెను

మెల్లన గుప్పెడు చల్లన తగిలిన

నల్లని తనువులే ఫెళ్ళున పగిలితే

సూటిగ జారిన నీర్బాణమొకటి

నా కిటికీపై వాలి నీల్సరళ రేఖగ మారగ
నిన్నటి చేదులు విరిగి మధువుగ మారెలె!

ఏమి సెప్పను జాలరసోదరా, ఈ కడలిని నా ఆకలి తీరెరా!

కడలి నీరు కడతేరి మేఘాల దారి పట్టిందిరా

తెమ్మెర రాగానికి మేఘం చినుకుని కన్నదిరా!

కరిగినా కురిసినా ఆ నీట ఉప్పు లేనేలేదురా
వుంటే, ఈ సంద్రపు సేప సప్పగ వుండేదిరా!
ఏమి సెప్పను జాలరసోదరా, ఈ కడలిని నా ఆకలి తీరెరా!

వేగపయన పవనపల్లకి

మేఘతనయ చినుకుపిల్లకి

వేగపయన పవనపల్లకి
సూర్యజనన తూర్పురేఖకి
హరిధనువే  జోడువరుడు పెళ్ళికి

నిజంగా కలలాంటిదే జ్ఞాపకం

నిజమేనని అనలేనిది జ్ఞాపకం

నూకలవే అంటే నవ్వింది నిజం
నిజంగా కలలాంటిదే జ్ఞాపకం
నీ పరిచయం ఓ మరిచిన నిజం

ఒకసారి ఆగాలి తిరిగే కాలం
ఆ క్షణాన్ని మరల చూపాలి గతం
నా కన్నుల్లో నిండాలి నీ జ్ఞాపకం
ఆ క్షణమే అవ్వాలి ఓ జీవితం

జ్ఞాపకాలు బరువైతే విసిరెయ్ గతంలోకి

మౌనివైతే ఆగదులే అరక్షణం కాలచక్రం

ఒంటరివైనా సాగునులే కడదాకా బ్రతుకు నిత్యం
జ్ఞాపకాలు బరువైతే విసిరెయ్ గతంలోకి
స్నేహితులే కరువైతే తొంగిచూడు మనసులోకి

ఒక్క స్నేహితుడూ లేడా?
అయితే నీకు నువ్వే నేస్తానివి
ఆపై కావలి వుంది దైవానిది

అన్నీ కలలైతే -- ఒక బతుకన్నదే మాయమైతే

అన్నీ కలలైతే  పోలా  

అసలు మనసన్నదే  లేకపోతే పోలా

ఇక గురుతన్నదే కరువైతే పోలా
ఒక బతుకన్నదే మాయమైతే పోలా

ఓ మరమనిషీ

ఆ చలి రాతిరిలో ఓ అరమనిషి
వణికే చలిలో తనకి చీకటే దుప్పటి
డొక్కలో కాళ్ళు పక్కనే కుక్కలు
అక్కరకు రాలేదు తను కన్నవారు

ఆ టీకొట్టు పక్కన

ఓ బక్కచిక్కిన ముసలమ్మ 

చేతిలో చిల్లర గలాసు
ఈగలు ముసిరినా తోలలేని వయసు

ఈ పెద్దమ్మగుడి ముందర
తల్లెవరో తెలియని పసికందు
స్నాన సంస్కారం లేక ఉప్పుచారాలు తేరిన దేహం
చిరిగిన  బట్టలు దుమ్మురాల్చే జుట్టు

యిన్ని చూసినా నాకు కన్నీరే రాదాయే
నా మనసుకు డబ్బు తెర అడ్డుపడిందా?
నా సంస్కారానికి చీకటి కమ్మిందా?
ఓ మరమనిషీ నువ్వు మనిషివేనని గుర్తుచేయ్యలా?